عن مرسي و الاستفتاء و خلافه ....

هل كان لاحدا ان يتخيل ان تنقطع الكهرباء عن القاهره و المحافظات في عز الشتاء ؟! بل والانئح في اوقات الظهيره عندما يكون معظم الناس في اشغالهم . في عز الظهر – تبقى انت اللي قتلت بابايا – يعني مافيش لا تكيفات و لا دافايات شغاله . الامر يبدو مجنونا "حبتين تلاته " لكن له ما يبرره , فمحطات توليد الطاقه تعاني من نقص الغاز و الجاز لتوليد الكهرباء . اما عن الغاز فبحمد الله و فضله و بمجهود جاد و مشكور من مرسي و حكومته دخلنا قائمه الدول المستورده للغاز – وقعنا على عقد لاستيراده من الجزائر – فحين اننا نصدر لدول المنطقه كلها تقريبا . و اما عن السولار فقد حدثنا فخامه زعيمنا المفدى منذ شهر تقريبا في حوار تليفزيوني استمر ما يقرب  او يزيد عن ساعه – بتاع الحب و الاحضان و رقبه الازازه – عن تطهير قطاع البترول و عن القبض على مهربين السولار الاوغاد ...عموما فقد عدنا الى ازمه الكهرباء في عز الشتاء و مش عايزكم تقلقوا من الصيف اللي جي , مش هيكون فيه ازمه لان تقريبا مش هيكون فيه كهرباء اصلا يعني ..

هذا باختصار هو وضع البلد ...فقد خرجنا من نقره مبارك الى دحديره لا يعلم مداها الا الله .و لا يخفى على احد ان مشروع النهضه كان قد حقق 70 % او ما يزيد من اهدافه بحسب ما قال السيد الرئيس في خطبه السادس من اكتوبر الماضي – بتاعه يوم سته اكتوبر كان يوم سبت – و هو كما تعلمون مجموع يدخل طب في تنسيق سنه 73 برضه . الا و لاننا شعب نمرود  فقد اطحنا بانجازات مشروع النهضه و مسكنا في مشاكله , فالبعض من الاوباش يدعي كذبا ان الجنيه قد هوى لاقل سعر له منذ ثمان سنوات و هذا كذب بيّن. و يدعي البعض الاخر ان الغاء حجوزات السياحه قد تجاوز ال 70 % ايضا في موسم هو الاهم للسياحه المصريه  و يقولون انه حتى بعد حادثه الاقصر في سنه 97 لم تلغى الحجوزات بمثل هذا الشكل في ظل اننا دوله 20 % من موارد دخلها القومي معتمد على السياحه الا اني اقول لهؤلاء المغرضين كفاكم زورا و بهتانا .يهملون اننا قصد حصلنا على استثمارات تزيد عن المئتين مليار جنيه - في فارم فيل و المزرعه السعيده و مونوبلي – و يتشدقون بسعينا لقرض صندوق النقد ذو المليارات الخمسه من الدولارات ....اسكتوا ايها الشياطين .

انظروا للجانب المشرق لقد حصلنا لاول مره على الاستقرار . فقد قالت الصناديق للاستقرار و الدستور و الدين و مرسي و الاخوان " نعم " و اللي مش عاجبه ياريت يروح جورجيا – الموضه الايام دي جورجيا مش كندا – صحيح ان هذا الدستور قد صوت عليه اقل من ثلث من لهم حق التصويت و صحيح انه قد وافق عليه اقل من ثلثي المصوتين في استفتاء نزيه حره شفاف ديموقراطي متحضر لم يشبه الا كام صندوق ناقص على كام صندوق بيخرج من اللجنه على 12 الف بلاغ فحصتهم اللجنه بتاعت الانتخابات ف 3 ايام – من تصريحات اللجنه - و طلعوا كلهم فشنك على اشراف قضائي كامل جدا على كام قريه كده اتمنع اهلها عشان اغلبيتهم "مسيحيييين " – باسم يوسف ستايل – من التصويت على كام عشره خماشر عشرين فيديو كده على يوتيوب هيتشالوا قريب ماتقلقوش يعني عن تصويت جماعي و تسويد و حاجات هبله كده , مش عارف انا انتم محبكين الدنيا ليه ...المهم ان الصناديق قالت ايه , نعم ..انتوا عارفين ان من اخطار رفض الدستور كانت ان الملحدين هيبقى ليهم معابد يصلوا فيها , اه و الله قالوا كده ..ما علينا , المهم ان الاستفتاء كان نزيه و شفاف و اللي مش عاجبه يروح يعمل محضر عن النائب العام .

هل تعلمون اننا نملك من الفيديوهات و المحاضر التي تدل على تزوير مبارك في استفتاء 2007 و انتخابات 2010 اقل مما نملك اليوم على هذا الاستفتاء .....الحمد لله ان مبارك مشي ! يا ساتر كان كابوس و انزاح .

عموما برضه و عشان البوقين الحمضانين اللي دايرين بيهم , و حياه الغاليين يا جدع دستور فرنسا بتاع سنه 54 ايوه اللي عدى بحاجه و ستين ف الميه موافقه دا سقط بعديها بسنتين و كتبوا واحد تاني في 58 اخد 83 % موافقه و قاعد معاهم اهو للنهارده ...اقولك بلاها دستور خالص , مالها بريطانيا زي الفل و معندهاش دستور , ممشينها "بالحب " !!

ملخصا , اقتصادنا ربما يمر بواحده من اسوأ الاوقات على الاطلاق , حقيقي انها لا تصل للفزع بتاع مش هنلاقي فلوس ف البنك و الكلام دا , انما يظل ان ما يحدث سوف يؤدي الى تضخم و زياده كبيره في الاسعار قريبا و زياده في معدلات البطاله و الخ الخ الخ ...و سياسيا فان هذا الدستور اصبح مدعاه للسخريه حتى من الباكستانيين – قالوا انهم لن يلجأو للنموذج المصري و سيتحاورون مع المعارضه – ربما لن يصمد , و نظام حكم يتميز بالشيزوفرينا فمنذ اسابيع قليله كان يقول على ال 56734 من المعارضه انهم مأجوزين و عملاء و لديهم مخططات و اليوم يدعوهم للحوار و من ثم يدفع بمؤيديه للشارع ليقتلوا و ينكلوا بمعارضيه  و هذا قول هؤلاء المعارضين لكننا جميعا نعلم ان كل الشهداء من الاخوان بما فيهم كرم جرجيوس . ماهو اصل المهم في المعارضه انها تكون معارضه مؤدبه , محترمه و بتت ناس و متربيه و مترفعش صوتها في وش ابوها ( اصل اعتبره زي ابوك يا اخي ) , ايوه عليكوا نور زي معارضه حزب الوسط كده ..  ...المهم ان زي ما قال الريس منتخب مصر كويس و كسب قطر 2- 0 ...اصل لو قعدنا نعدلهم المصايب مش هنخلص !

بصوا كل لما تضيق بيكم افتكروا ان احمد عز وقف يصفق لنفسه و للحزب في مؤتمر الحزب احتفالا بنتيجه الانتخابات و ان مبارك قالهم " خليهم يستلوا " ....يا راجل دا احنا يوم 24 يناير 2011 كنا بنتريق على قال ايه ثوره , هو فيه ثوره بمعاد برضه ...! 

Posted in: