تبدأاحداث القصة وانا ابحث عن مكان اللجنة التى سيتم فيها امتحان سيادتى شفهيا و انا ماشى اصلا بكلم نفسى من اللى حصل فىً فى امتحان النظرى و عمال اسب و العن فى واضع الامتحان و فى الامتحان و فى المراقب و فى جميع الشخصيات اللى قابلتها اليوم ده الكارتونية منها و الحقيقية ايضا
استرحت قليلا ووقفت امام اللجنة انتظر من سيخرج من عند حضرة البيه الدكتور عشان اخمن او استفسر بيسأل فى ايه يمكن يكون بيسأل نفس الاسئلة و غالبا كل مرة بيخيب ظنى لأن اغلب الدكاترة فهموا الحوارات دى لكن المفاجأة المرة دى ان الدكتور لسه مجاش فضلت منتظر ساعة ورا ساعة الى ان اكتشفنا بالصدفة البحته ان الدكتور راح يجامل دكتورة تانية مقدرتش تيجى وراح خد مكانها و سابنا احنا ملطوعين المهم اننا عرفنا مكان البرنجى اللى هايمتحنا
من الانتظار لسيادة الباشا عشان ييجى الى الانتظار من انه ينجز و هو بيمتحن الناس مكانش بينهم فرق كبير نفس الرتابة و الملل و الوقت اللى مبيعديش و قلق الطلبة بره اللجنة و اللهفة على كل طالب خارج تسأله ايه الاخبار و نفس السؤال المتكرر ايه بيسأل فى ليه و ايده فرطة و لا لأ و اسئلة كده تحسسك انه مش دكتور تحسه عريس متقدم لبنتك
عزيزى القارىء (على رأى الكتاب الكبار) مأساتى لم تبدأ بعد المأساه كانت مع بداية دخولى لجنة الامتحان مع "رضا" اينعم "رضا" رضا دى مؤنث بالمناسبة..........انثى يعنى بس مش اى انثى مع ان اسمها ذكورى جدا الا انها انثى حقيقية كما يقول الكتاب .....عينين ملونين و شعر ماشوفتش لونه ايه عشان كانت محجبة بس المهم دخلت مع رضا و باقى الرفاق للجنة و اليكم الاحداث بدون تهويل او مبالغة
بدأ الدكتور باعطائنا ورقة الغياب بينما بدأت رضا باثبات حضورها ووجودها بطريقة تانية حيث وضعت رجل على رجل واول م حطت الرجل على الرجل انا عينى كانت هتبظ منى مش على رضا صدقونى بس احتراما للنجم اللى هايمتحنا ده و الله بس للاسف مالقتش منه اى امتعاض ولا منها اى احراج
بدأت الاسئلة و جاء الدور على رضا و كانت اللحظة التاريخية و الان السؤال الاول و سمعت فى ودانى موسيقى برنامج من سيربح المليون و صوت دقات القلب يرتفع رويدا رويدا و تحركت شفتاها لتجاوبان و انا بقول جوه نفسى يا رب يا رضا متخلصى النهارده استفيضى يا رضا افحميه اشجى كده و سمعينا الاجابات النموذجية و الله دا انتى مدرسة و هى عينيها مركزة مع الدكتور يا بخته بصراحة
وهنا بدأ الدكتور يتلعثم و يقولى يا ريمون و يقول لريمون يا خالد و يقول احمد يا مايكل بينما رضا نالت اقب "حبيبتى" و الله العظيم كان بيقولها حبيبتى و عشان متقولوش ده قد ابوها لأ ده قد خطيبها حبيبها حاجة كده بتاع تلاتين سنة
لن ابالغ و اقول ان الدكتور كان ناشف معانا او كرهنا و احب رضا فقط لأ هو حبنا كلنا الصراحة و تيقنت فى نهاية الامتحان انه احبنا كلنا من اجل رضا
عاشت رضا .......وعاش الدكتور
ولنذهب جميعا للجحيم
"ملحوظة : رضا جابت 28 من 30
2 التعليقات:
mark fe moza 3andena fe el kolya bet5osh ma3aya keter fe el shafway fe mara el doc kan 3ayez ye3akesha olely ya amora eh el hormone elly bey5aly weshek yehmar keda
وانت جبت كام يا مارك
إرسال تعليق